د پلټنې د مسلکي زده کړو درې میاشتیني پروګرام فارغانو ته د باور لیکونو د ویش غونډه جوړه شوه
د پلټنې عالي ادارې د پلټنې د مسلکي زده کړو درې میاشتني پروګرام فارغانو ته د باور لیکونو د ویش غونډه، چې پکې د پلټنې عالي ادارې رییس ښاغلي الحاج مولوي محمد محسن هاشمي، د کړنو او ځانګړې پلټنې عمومي رییس ښاغلي مولوي نورحیدر صدر، د ادارې د مقام ستر مسلکي سلاکار ښاغلي فضل الله نظامي، د دفتر رییس ښاغلي مفتي قدرت الله همت، د مسلکي وړتیا لوړنې رییس ښاغلي سید رحمن رحمن، نورو رییسانو او د ځینو ادارو د کورنۍ پلټنې ریاستونو پلټونکو ګډون درلود، د ۱۴۴۵ هـ ق کال د ربیع الاول په ۱۵ د دې ادارې د ناستو په عمومي تالار کې جوړه شوه.
غونډه د قرانکریم په مبارکو ایاتونو پیل شوه، ورپسې د مسلکي وړتیا لوړونې رییس ګډونوالو ته ښه راغلاست ووایه، زیاته یې کړه: په دې پروګرام کې د ۲۰ امارتي ادارو او وزارتونو د کورنۍ پلټنې ریاستونو ۳۲ پلټونکو ګډون درلود، چې په درې میاشتنۍ موده کې یې تخصصي او مسلکي زده کړې وکړې، له دې ورسته به په یادو ادارو کې د پلټنې مسلکي کدرونو په توګه چارې مخته وړي.
د غونډې په دوام د پلټنې عالي ادارې رییس ښاغلي الحاج مولوي محمد محسن هاشمي د قران کریم مبارکو ایاتونو او نبوي احادیثو په رڼا کې د علم او پوهې ارزښت، له تیارو نه د ژغورونکې رڼا سره برابر وباله، او زیاته یې کړه: په دې کې شک نشته، چې د شرعي یا عصري علومو، پوهه، زده کړه، درک او بصیرت په دنیا او اخرت کې د انسان د نیکمرغۍ سبب کیږي او هغوی نیکمرغه دي، چې په دې ارزښتمنه ګاڼه ځان سمبال کړي. د پلټنې عالي ادارې رییس همدا راز زیاته کړه: افغانستان د ټولو افغانانو ګډ کور دی، په اسلامي امارت کې ټول مساوي حقونه لري، هیڅوک له چا پورته نه دی، نور راځئ، ټول ( متخصصین، انجینران، پوهنتون استادان، پوهان او ....) یوځای په مسولانه ډول د هېواد په ابادۍ، پرمختګ او رغونه کې خپله ونډه ادا کړو.
نوموړي د ټولو نظامي او ملکي امارتي ادارو له مسوولینو وغوښتل، څو خپل کارکونکي د ظرفیت لوړونې او مسلکي کدرونو د روزنې په پار د پلټنې عالي ادارې ته وروپیژني، تر څو ددې ادارې د مسلکي او تخصصي موضوعاتو او پروګرامونو نه ګټه ترلاسه او په خپلو ورځینو رسمي چارو کې یې عملي کړي، چې د افغانستان اسلامي امارت د مالي سیستم روڼتیا، حساب ورکونې او پیاوړتیا سبب وګرځي.
د غونډې په پای کې، د یاد پروګرام فارغانو ته د پلټنې عالي ادارې د رهبرۍ له لوري باورلیکونه ورکړل شول.
