د پلټنې عالي ادارې پلاوي، مالیې وزارت کې د ۱۴۰۱ مالي کال د قطعیه حساب پلټلو ناسته جوړه کړه
د پلټنې عالي ادارې د ۱۴۰۱ مالي کال د قطعیه حساب پلټلو کمېسیون، چې مشري یې د پلټنې عالي ادارې د مالي چارو او تقنیني اسنادو د پلټنې مرستیال ښاغلي مولوي عزت الله حقاني کوله، د ۱۴۴۴ هـ ق کال د ذوالحجې په ۱۹ د ماليې وزیر ښاغلي الحاج ملا محمدناصر اخند او نورو مسولینو سره د ۱۴۰۱ مالي کال د قطعیه حساب پلټلو په پار ولیدل.
ناسته کې ښاغلي مولوي عزت الله حقاني د مالي وزارت له مسوولینو د ۱۴۰۰ مالي کال د وروستي حساب ارزولو په پروسه کې د کړې همکارۍ له امله مننه وکړه او زیاته یې کړه: د ا.ا.ا د ریاست الوزرا د حکم پر بنسټ د پلټنې عالي اداره د ټولو امارتي ادارو د پلټلو واک په غاړه لري، چې اوس د پلټنې بهیر په ځینو ولایتونو کې پیل دی. د ناستې په اوږدو کې ښاغلي مولوي عزت الله حقاني د امارت د قطعیه حساب پلټلو په ارزښت معلومات وړاندې کړل او په دې بهیر کې یې د مالیې وزارت له مشرتابه یې د همکارۍ غوښتنه وکړه.
ښاغلي الحاج محمد ناصر اخند د پلټنې عالي ادارې مسوولینو ته د ښه راغلاست تر څنګ، پلټنه په ادارو کې د ستونزو، نېمګړتیاوو او تېروتنو د سمون په پار اړینه وبلله او د قطعیه حساب پلټلو کې یې د هر اړخیزې همکارۍ ډاډ څرګند کړ.
د یادولو ده، چې د امارت د قطعیه حساب د بودیجې د پلي کېدا څرنګوالی او د هېواد مالي حالت په یوې مالي دوره معمولا په یو مالي کال کې ښیي. د ۱۴۰۱ کال ارزونه د ۱۴۰۲ مالي کال د چنګاښ له لومړي نېټې پیل او د ۱۴۰۲ کال د وږي په ۳۰ پای ته رسیږي.
