د پلټنې عالي ادارې پلاوي؛ پېښو ته د رسېدو په چارو کې د دولت وزارت کې د پلټنې پای غونډه جوړه کړه
د پلټنې عالي ادارې پلاوي؛ چې پکې د دې ادارې د دعوت او ارشاد رییس ښاغلي مولوي محمد عیسی راهب، د حکومتولۍ او قانون حاکمیت د پلټنې برخې رییس ښاغلي نثاراحمد ثبات، د رسنیو او عامه اړیکو امر ښاغلي حافظ جنیدالله حاذق او د پلټنې ډلې غړو ګډون درلود، د ۱۴۴۵ هـ ق کال د شوال په ۲۳ نېټه، پېښو ته د رسېدو په چارو کې د دولت وزارت د دفتر رییس ښاغلي مولوي شاه ولي صابر، مالي او اداري رییس ښاغلي مولوي عبدالله محمدي، رییسانو او نورو کارکونکو سره ولیدل.
ناسته کې د پلټنې عالي ادارې پلاوي، پېښو ته د رسېدو په چارو کې د دولت وزارت له مسوولینو د پلټنې په بهیر کې د کړې همکارۍ له امله مننه وکړه، او پلټنې او حساب ورکونې په ارزښت یې د اسلام مبارک دین په رڼا کې هر اړخیز معلومات وړاندې کړل د پلټنې پلاوي همداراز د یاد وزارت مسوولینو ته د پلټنې موندنو د راپور مسودې یوه کاپي د هغوی د نظر اخیستلو په پار وړاندې کړه.
ورپسې پېښو ته د رسېدو په چارو کې د دولت وزارت مسوولینو پلاوي ته ښه راغلاست ووایه او پلټنه یې په ادارو کې اصلاحاتو رامنځته کولو په پار اړینه وبلله، دوی د پلټنې پلاوي ته د پلټنې د موندنو او سپارښتنو د عملي کېدا ژمنتیا څرګنده کړه.
