د پلټنې عالي ادارې پلاوي، د افغانستان علومو اکاډمۍ کې د پلټنې پرانیست غونډه جوړه کړه
د پلټنې عالي ادارې ټاکل شوي پلاوي؛ چې پکې د دې ادارې د دعوت او ارشاد رییس ښاغلي مولوي محمدعیسی خان راهب، د پوهنې، روغتیا او کلتور د پلټنې برخې رییس ښاغلي عبدالاحد قیومي او نورو پلټونکو ګډون درلود، د ۱۴۴۴ هـ ق کال د ذوالقعدې میاشتې په ۴ نېټه د علومو اکاډمۍ له مالي او اداري عمومي رییس ښاغلي معلم نیازخان محتاج او نورو غړو سره ددې ادارې د پلټلو لپاره پرانیست غونډه جوړه کړه.
غونډه د قرانکریم په مبارکو ایاتونو پیل شوه، له پېژندنې وروسته ښاغلي مولوي محمدعیسی خان راهب د پلټنې عالي ادارې د موخو، کړنو او لاسته راوړنو په اړه او نبوي حدیثونو په رڼا کې د پلټنې په ارزښت او حساب ورکونې ګډونوالو ته معلومات وړاندې کړل.
په پای کې ښاغلي معلم نیاز خان محتاج په عامه ادارو کې پلټنه حکومت ته د عامه شتمنیو د لګښت حساب ورکونې په پار یوه اړتیا وبلله او په دې اداره کې یې له پلټونکو سره د هر اړخېزې همکارۍ ژمنتیا څرګنده کړه.
