د پلټنې عالي ادارې د رهبرۍ پلاوي شپږ ویشتمه ناسته ترسره شوه
د پلټنې عالي ادارې د رهبرۍ پلاوي ۲۶ ناسته د پلټنې عالي ادارې رییس ښاغلي الحاج مولوي محمد محسن هاشمي په مشرۍ او د مرستیالانو، سلاکارانو او رییسانو په ګډون، د ۱۴۴۵ هـ ق کال د رمضان المبارک په ۳ نېټه ترسره شوه.
ناسته د قرانکریم په مبارکو ایاتونو پیل شوه، ورپسې د پلټنې عالي ادارې رییس ښاغلي مولوي محمد محسن هاشمي ګډونوالو ته د ښه راغلاست ترڅنګ د روژې د رارسېدو له امله مبارکي ورکړه او زیاته یې کړه: په یو هېواد کې د اداري او ټولنیزو چارو بریالیتوب او د امنیت ټینګښت له دیندارۍ او له دین سره د خلکو یو ځای کېدو سره تړلي دي، په هغه ځای کې، چې دین شتون نلري اداري او ټولنیز فساد او د جنایي جرمونو کچه پکې لوړه وي. دین د پټ پولیس په څېر د انسان په وجود کې فعالیت کوي او انسان له بدو اعمالو ساتي، له همدې امله په افغانستان کې د اسلامي امارت په حاکمیت سره د جرمونو کچه بیخي کمه شوي او سرتاسري امنیت رامنځته شوی.
ښاغلي مولوي هاشمي هېواد کې د اسلامي امارت حاکمیت او ترلاسه شوې خپلواکي د دوو اشغالګرو(روسیې او ناټو) پر وړاندې د مجاهدینو د پاکو وینو د توېیدو پایله وګڼله، د پلټنې عالي ادارې رییس همدار راز وویل: د افغانستان اسلامي امارت رییس الوزرا ښاغلي ملا محمد حسن اخند سره لیدنه کې نه یوازې دا؛ چې هغوی د دې ادارې له مقام دفاع کړې بلکې د ادارې تشکیل په زیاتوالي یې هم ټینګار وکړ.
ورپسې د پلټنې عالي ادارې مسلکي مرستیال ښاغلي مولوي عزت الله حقاني د پلټنې عالي اداره له نورو امارتي ادارو سره د عامه شتمنیو په ساتنې، د عوایدو په سمو راټولولو او د بودیجې پر ځای لګښت کې ښه همکاره وګڼله او زیاته یې کړه: د پلټنې عالي ادارې د کارونو په ارزښت او اغیز د نورو امارتي ادارو مسوولین پوه دي ځکه خو په خپلو کړنو کې د ګټورتوب او اغيزمنتوب رامنځته کولو په پار د پلټونکو د کاري وخت د ډېرېدو غوښتنه کوي.
ښاغلي حقاني د خپلو خبرو په دوام زیاته کړه: تېر کال د پلټنې عالي ادارې لپاره له لاسته راوړنو ډک و، هڅه کوو، چې په راتلونکي کال کې هم د پلټنې عالي ادارې د مقام تر لارښوونې لاندې ددې ادارې لوړو موخو ته د رسېدو په برخه کې په پوره امانتولۍ او صداقت سره کار وکړو.
د ناستې په لړ کې اجنډا کې شته موضوعات یوـ یو ولوستل شو، د مسوولینو له نظر ورکولو وروسته یې په اړه اړینې پرېکړې وشوې.
