د پلټنې عالي ادارې پلاوي؛ د کابل ښارولۍ په ديارلسمه ناحيه کې د پلټنې پرانيست غونډه جوړه کړه
د پلټنې عالي ادارې پلاوي، چې پکې د ښارواليو د پلټنې برخې رييس ښاغلي مولوي محمد حسن موسی زي، د پلټنې ډلې امر او غړو ګډون درلود، د ۱۴۴۵ هـ ق کال، د ذوالقعدې په ۲ نېټه، د کابل ښاروالۍ ديارلسمې ناحيي رييس ښاغلي مولوي عبدالصمد عابد، د يادې ناحيې مرستيال ښاغلي مولوي محمد خان ايوبي او نورو کارکونکو سره د پلټنې پرانيست غونډه جوړه کړه.
غونډه د قران کريم په مبارکو اياتونو پيل شوه، ورپسې د پلټنې عالي ادارې پلاوي ګډونوالو ته د پلټنې عالي ادارې په کړنو هر اړخيز معلومات وړاندې کړل او زياته يې کړه په امارتي نظام کې هېواد ته خدمت کول سپيڅلي جهاد سره ورته والی لري، ديادي ناحيې له مسوولينو يې وغوښتل، چې د پلټنې په بهير کې دې له پلټونکو سره همکاري ترسره کړي ترڅو د استعلامونو په وخت ځوابولو کې اسانتيا رامنځ ته شي.
د غونډې په پای کې د کابل ښاروالۍ ديارلسمې ناحيې مسوولينو د پلټنې عالي ادارې ورغلي پلاوي ته ښه راغلاست ووايه او د پلټنې عالي ادارې له کړنو يې خوښي څرګنده کړه او د پلټنې په بهير کې يې پر وخت د هر اړخيزې همکارۍ ډاډ څرګند کړ.
