د پلټنې عالي ادارې پلاوي؛ د چارو اداره کې د پلټنې پرانیست غونډه جوړه کړه
د پلټنې عالي ادارې پلاوي؛ چې پکې د دې ادارې حقوقي سلاکار ښاغلي مولوي الهام الدین عمر، د حکومتولۍ او قانون حاکمیت د پلټڼې برخې رییس ښاغلي نثاراحمد ثبات او د پلټنې ډلې غړو ګډون درلود، د ۱۴۴۵ هـ ق کال د جمادي الثاني په ۳ نېټه د چارو ادارې له مالي او اداري مرستیال ښاغلي مولوي محمد صابر المعتصم باالله او نورو مسوولینو سره ولیدل.
ناسته کې د پلټنې عالي ادارې پلاوي د قرانکریم او نبوي ارشاداتو په رڼا کې د بیت المال په ساتنې معلومات وړاندې کړل، ورپسې یې د پلټنې په بڼو، موخو، د پلټنې په بهیر کې د پلټونکو په مسوولیتونو او د پلټل کېدونکې ادارې په مکلفیتونو خبرې وکړې.
د پلټنې عالي ادارې مسوولینو د پلټنې اصلي موخه د پلټل کېدونکو ادارو د ستونزو او نیمګړتیاوو پیدا کول او ورته د حل لارو وړاندې کول یاد کړل او زیاته یې کړه: د پلټنې عالي ادارې رهبري تل کوښښ کوي تر څو د مسلکي او کیفیت لرونکې پلټنې پر مټ په خپلواک ډول د مسلکي پلټونکو پر هڅو د عامه شتمنیو له سم لګښت او د عوایدو له سم راټولېدو خپل ولس او د اسلامي امارت عالي مقام ته ډاډ ورکړي.
پای کې د چارو ادارې مالي او اداري مرستیال ښاغلي مولوي محمد صابر المعتصم باالله پلټنه د ستونزو او نیمګړتیاوو د رابرسېره کولو په پار مهمه چاره یاده کړه، چې ورسره عامه اداره او هېواد پرمختګ کوي، د یادولو ده، چې نوموړي له پلټونکو سره د پلټنې په بهیر کې د هر اړخیزې همکارۍ ډاډ څرګند کړ.
