د پلټنې عالي ادارې پلټونکو او کارکونکو ته د پلټنې د بنسټونو او مهارتونو ښوونیز پروګرام جوړ شو
د پلټنې عالي ادارې پلټونکو او کارکونکو ته د پلټنې د بنسټونو او مهارتونو ښوونیز پروګرام د یوې ناستې په لړ کې، چې پکې د ځانګړې او عملکرد پلټنې عمومي رییس ښاغلي مولوي نورحیدر صدر، د مسلکي وړتیا لوړونې رییس ښاغلي سیدرحمن رحمن، د دې پروګرام ښوونکو او ګډونوالو حضور درلود، د ۱۴۴۵ هـ ق کال د شوال المکرم په ۱۳ نېټه پیل شو.
د پروګرام په پیل کې ښاغلي سیدرحمن رحمن د درسي موادو په اړه، چې پکې د پلټنې، مالیې، کمپیوټر، مدیریت اصول او رهبرۍ بنسټونه شامل دي خبرې وکړې او له ګډونوالو یې وغوښتل، چې له دې فرصت د خپلې مسلکي پوهې د لوړونې په پار ګټه پورته کړي.
ورپسې ښاغلي مولوي نورحیدر صدر د پوهې د ترلاسه کولو ارزښت په اړه د قرانکریم د ایاتونو او نبوي احادیثو په رڼا کې معلومات وړاندې کړل او زیاته یې کړه: د اسلام مبارک دین یوازې عباداتو ته ځانګړی نه دی، بلکې پکې بېلاـ بېل اړخونه لکه معاملات، زده کړې او نور موارد شتون لري، چې انسانانو ته په ټولو اړخونو کې امر کوي، نوموړي د خپلو خبرو په پای کې د پلټنې په وخت کې د پلټونکو په جرات او امانتولۍ ټینګار وکړ.
