د مالیې وزارت د دولتي شرکتونو له عمومي رییس سره ناسته؛
د کړنو او معلوماتي ټکنالوجۍ د پلټنې مرستیال سید بلال هاشمي په مشرۍ او د دولتي تصدیو او شرکتونو د پلټنې د رییس غلام حیدر رسولي په ګډون د مالیې وزارت د دولتي شرکتونو له عمومي رییس ډاکټر میرویس بهیج او د یاد وزارت د دولتي شرکتونو د څارنې له رییس سید بلال صافي سره د ۴۵ دولتي شرکتونو او یوې تصدۍ د پلټنې اړوند موضوعاتو په اړه چې د پلټنې عالي ادارې له خوا پلټل کېږي، ناسته وشوه.
په دې ناسته کې د پلټنې عالي ادارې له خوا په دولتي شرکتونو او تصدیو کې د مالي راپور ورکونې د سیسټم رامنځته کولو، د بشري سرچینو د ظرفیت لوړولو او د مدیریت او څارنې پر غوره لارو چارو ټینګار وشو.
د مالیې وزارت د دولتي شرکتونو عمومي رییس ډاکټر میرویس بهیج د دولتي شرکتونو د پلټنې په برخه کې تعهد او ډاډ ورکړ چې د دغه ادارې له سپارښتنو سره سم به د شرکتونو د ارزونې او سیستم جوړونې، د پلټنې په پروسه کې د آسانتیاوو رامنځته کولو، په شرکتونو کې د زړو سیستمونو پر ځای د نویو سیستمونو د کارولو، د IFRS پر بڼسټ د شرکتونو له خوا د معیاري راپورونو د وړاندې کولو او مسلکي کسانو د ګومارلو په برخه کې هر اړخیز ګامونه واخلي.
