د پلټنې عالي ادارې د نظارت پلاوي د بغلان ولايت امنيه قومندان سره وليدل
د پلټنې عالي ادارې پلاوي، چې پکې د دې ادارې حقوقي سلاکار ښاغلي مولوي الهام الدين عمر، د پلټنې د موندنو د تعقيب او راپور ورکونې رئيس ښاغلي مولوي سعدالدين سعدي، د زراعت او زيربنا سکتور د پلټنې آمر ښاغلي ضيا الدين احمدي او نورو غړو ګډون درلود، د ۱۴۴۵ ھ ق کال د ربيع الاول په ۲۳ نيټه د بغلان ولايت له امنيه قومندان ښاغلي الحاج جان محمد حمزه او يو شمير نورو امنيتي مسئولينو سره ناسته ترسره کړه.
غونډه د قرانکريم په مبارکو اياتونو پيل او ورپسې د بغلان ولايت امنيه قومندان د پلټنې عالي ادارې څخه راغلي پلاوي ته ښه راغلاست ووايه او د دې ادارې کارونه يې د نظام د پايښت لپاره اړين وباله.
ښاغلي مولوي الهام الدين عمر بيا د پلټنې عالي ادارې په اړه هر اړخيز معلومات وړاندې کړه او زياته يې کړه: د پلټنې عالي ادارې دنده د اسلامي امارت په ټولو نظامي او ملکي ادارو کې د شفافيت، حساب ورکونې او ښه مدیریت څخه اطمینان ترلاسه کول دي، او دا د ټولو ګډ مسؤليت دې چې پدې برخه کې يو بل سره همکاري وکړو. همداراز نوموړي د پلټنې د موظف شوي پلاوي سره د لا زياتې همکارۍ غوښتنه وکړه.
د غونډې په پای کې ښاغلي جان محمد حمزه د پلاوي د نظر اوريدلو ترڅنګ د پلټنې پلاوي سره د هر ډول همکارۍ ډاډ ورکړ.
