د پلټنې عالي ادارې پلاوي، په افغان جاپان روغتون کې د پلټنې پرانیست غونډه جوړه کړه
د پلټنې عالي ادارو نړیوالو معیارونو په نظر کې نیولو سره؛ د پلټنې عالي ادارې پلاوي د ۱۴۴۴ هـ ق د رجب المرجب په۲۹ نیټه، د پلټنې عالي ادارې د دعوت او ارشاد رییس ښاغلي مولوي محمد عیسی خان راهب، د پوهنې، روغتیا او کلتور د پلټنې برخې رییس ښاغلي عبدالاحد قیومي او نورو غړو په افغان جاپان روغتون کې ددې روغتون له رییس ښاغلي محمد اسحاق بیان او نورو مسوولینو سره د پلټنې پرانیست غونډه جوړه کړه.
د غونډې په پیل کې ښاغلي مولوي محمدعیسی خان راهب د پلټنې عالي ادارې په موخو، صلاحیتونو، مسوولیتونو او تر پلټنې لاندې بنسټ په مکلفیتونو هر اړخیز معلومات وړاندې کړل، ورپسې ښاغلي عبدالاحد قیومي په ادارو کې د قوانینو او مقرارتو د پامنیوي پلټنې په اړه معلومات وړاندې کړل، نوموړي د افغان جاپان روغتون له مسوولینو د پلټنې په جریان کې له پلټونکو سره د همکارۍ او په وخت استعلامونو ته د ځواب ویلو غوښتنه وکړه.
په پای کې د افغان جاپان روغتون مسوولینو له پلټونکو سره د پلټنې په بهیر کې د لازمو معلوماتو او اسنادو په برابرولو کې د همکارۍ ډاډ ورکړ.
