د پلټنې عالي ادارې پلټونکو او کارکونکو ته جوړ شوی درې ورځینی سيمینار پای ته ورسید
د پلټنې عالي ادارې له لورې ددې ادارې پلټونکو او کارکونکو ته د دوی د وړتیا لوړونې په موخه درې ورځینی سیمینار، چې ددې ادارې د رییس ښاغلي الحاج مولوي محمد محسن هاشمي، مرستیالانو، سلاکارانو، رییسانو، پلټونکو، امرینو او نورو کارکونکو په ګډون جوړ شوی و، د ۱۴۴۵ هـ ق کال د رمضان په ۱۶ نېټه پای ته ورسید.
د سیمینار په لومړۍ ورځ د پلټنې عالي ادارې رییس ښاغلي مولوي محمد محسن هاشمي د یاد سیمینار د ارزښت، د پلټونکو په صفتونو او د اسلامي شریعت سره سم د ژوند تېرولو په ګټو هر اړخیزې خبرې وکړې.
د ادارې د مقام ستر مسلکي سلاکار ښاغلي فضل الله نظامي بیا د پلټنې د معیارونو په اړه معلومات وړاندې کړل. ورپسې د ادارې حقوقي سلاکار ښاغلي مولوي الهام الدین عمر بیا د پلټونکو اخلاقي اصول د اسلام مبارک دین له لیده روښانه کړل.
د سیمینار په دوهمه ورځ د عملکرد او ځانګړې پلټنې عمومي رییس ښاغلي مولوي نورحیدر صدر د اسلام مبارک دین په رڼا کې د پلټنې په ارزښت او د پلټنې عالي ادارې د دعوت او ارشاد رییس ښاغلي مولوي محمد عیسی راهب بیا له جماعت سره د ترسره شوي لمونځ په فضیلت خبرې وکړې. د همدې ورځې په لړ کې د حکومتولۍ او قانون حاکمیت برخې د پلټنې رییس ښاغلي نثاراحمد ثبات او د عملکرد او چاپېریال ساتنې رییس ښاغلي احمد شکیب ستاري د پلټل کېدونکو ادارو له مسوولینو سره د همغږۍ او د ګډو پلټنو د ترسراوي په طریقو هر اړخیز معلومات وړاندې کړل.
د سيمینار په وروستۍ ورځ د پلټنې عالي ادارې مسلکي مرستیال ښاغلي مولوي عزت الله حقاني د امانتولۍ، رازساتنې، او د پلټنې د راپورونو پټ ساتلو اړوند د قران او احادیثو په رڼا کې خبرې وکړې او زیاته یې کړه: راز ساتنه په اسلام کې یو اصل دی او ښکاره کول یې حرام دي، همدارنګه رازساتنه یو امانت او په ژمنه وفا ده، څوک، چې راز ښکاره کوي د لوی خیانت ترسره کونکی دی. نوموړي د پیغمبر ص او صحابه کرامو په ژوند کې راز ساتنه په هر اړخیز ډول تشریح کړه.
ښاغلي عزت الله حقاني همدراز زیاته کړه: د پلټنې عالي ادارې دنده په نورو ادارو کې د اصلاحاتو رامنځته کول دي، ټولې ملکي او نظامي ادارې په دې ادارې باور لري او پلټونکو ته یې د پلټنې پر بهیر کې اسناد او معلومات په واک کې ورکوي، پلټونکي مکلف دي، چې د ادارو رازونه پټ وساتي تر څو د پلټنې عالي ادارې او نورو ادارو تر منځ د بې باورۍ سبب نشي.
ورپسې د پلټنې عالي ادارې د دفتر رییس ښاغلي مفتي قدرت الله همت وینا وکړه او یاد سيمینار یې د فساد پر وړاندې وقایوي سيمینار وباله، زیاته یې کړه: هر عمل، چې د اسلامي شریعت او اسلامي قوانینو خلاف ترسره شي، فساد دی، د پلټنې عالي ادارې دفتر رییس د لوړ رتبه امرینو او مسوولینو له امرونو سرغړونه، منفي فکر کول، ناسم چلند، له واکه غلطه ګټه اخیستنه، مالي او جنایي سرغړونې په عامه ادارو کې د اداري فساد په توګه وشمېرل او په دې اړه یې هر اړخیزې خبرې وکړې.
پای کې د بنسټیزو پروژو، طبيعي سرچینو، اقتصاد او زراعت برخې د پلټنې رییس ښاغلي وحیدالله پویا د کورنیو کنټرولولو د ارزښت په اړه هراړخیز معلومات وړاندې کړل.
