پلټنې عالي اداره کې د قرانکریم د ژباړې د ختم پروګرام پای ته ورسید
د افغانستان اسلامي امارت د عالیقدر امیر المومنین حفظه الله او ریاست الوزرا د پریکړې پر بنسټ او د دعوت ارشاد عمومي ریاست له لارښوونو سره سم او د پلټنې عالي ادارې د دعوت او ارشاد رییس ښاغلي مولوي محمد عیسی راهب له لوري د قرانکریم د ژباړې پروګرام د ښاغلي مولوي ادم خان ادمي پر مټ د دې ادارې کارکونکو ته د ۱۴۴۵ هـ ق کال د شعبان په ۱۵ نېټه پیل کړ، او د ۱۴۴۵ هـ ق کال د رمضان المبارک په ۲۸ نېټه، د یو لړ ځانګړو مراسمو په لړ کې، چې پکې د پلټنې عالي ادارې رییس ښاغلي الحاج مولوي محمد محسن هاشمي، د مالي چارو او تقنیني اسنادو د پلټنې مرستیال ښاغلي الحاج مولوي عزت الله حقاني، سلاکارانو، رییسانو، امرینو او نورو کارکونکو ګډون درلود، پای ته ورسید.
په دې پروګرام کې ښاغلي الحاج مولوي عزت الله حقاني د ادارې د دعوت او ارشاد ریاست له مسوولینو د مننې تر څنګ؛ د ورستیو سورتونو (الاخلاص، الفلق، الناس) ژباړه او تفسیر وکړ، او د پلټنې عالي ادارې رییس ښاغلي الحاج مولوي محمد محسن هاشمي ټول مسلمه امت، د افغانستان مجاهد ولس، د فلسطین اوسېدونکو او په افغانستان کې د راغلي امنیت د پایښت لپاره د لوی خدای ج دربار ته د دعا لاسونه پورته کړل.
