د پلټنې عالي ادارې مسؤلینو نن پنجشنبه د ۱۳۹۹ لمریز کال د تلې په دریمه نیټه د ملي شورا ولسي جرګې مالي او بودجې کمیسیون سره، د یوې ناستې په ترڅ کې چې پکښې ښاغلي رحمت الله سوله مل؛ د مالي پلټنې عمومي رئیس؛ سید امین امین؛ د راپورونو د شننې رئیس؛ سمیع الله سباوون؛ د کړنو د پلټنو رئیس؛ او محمد اشرف عالمي؛ د قطعیه حساب د پلټنې او پارلمان سره د اړیکو رئیس، ګډون درلود، د قطعیه حساب د پلټلو راپور کې د موندنو د لا ډېر وضاحت په اړه يې ددې کمیسیون د رئیس او غړو د غوښتنې له مخې یې پرزنتیشن وړاندې کړ.

په پیل کې ښاغلی الحاج میر افغان صافي؛ د ولسي جرګې د مالي او بودجې کمیسیون رئیس د پلټنې عالي اداري مسؤلینو ته هرکلی ووایه.

ور پسې د پلټنې عالي ادارې د راپورونو دشننې ریاست رئیس سید امین امین له لوري په څرګنده توګه پرزنتیشن وړاندې شو.

چې په پرزنتیشن کې د ۱۳۹۸ مالي کال په قطعیه حساب کې ټولې موندنې د کمیسیون له رئیس او غړو سره شریکې شوې او په قطعیه حساب کې د یادو موندنو په اړه هر اړخيزې څرګندونې وشوې چې د ښاغلو وکیل صاحبانو د قناعت وړ وګرځېدې.

دغونډې په پای کې، د ولسي جرګې د مالي او بودجې کمیسیون رئیس او غړو یې، د پلټنې عالي ادارې د قطعیه حساب د پلټلو د مسؤلینو هڅې او زیارونه وستایل او مننه یې ترې وکړه.