د پلټنې عالي ادارې برښنایي معلوماتي سیستمونه پرانستل شول
۱۲. زمری. ۱۴۰۰
د افغانستان د ډیجیټل سازۍ د اونۍ په لړ کې د پلټنې عالي ادارې برښنایي سیستمونه چې د دې ادارې د معلوماتي ټکنالوژۍ ریاست له خوا طرحه او ډیزاین شوي وو، پرانستل شول.
د یادو سیستمونو په پرانستغونډه کې چې د پلټنې عالي ادارې مرستیالانو، رییسانو او کارکوونکو ګډون درلود، د کړنو او معلوماتي ټکنالوژۍ په چارو کې د پلټنې مرستیال ښاغلي سید بلال هاشمي د چټکتیا، روڼتیا او حساب ورکونې په برخه کې د معلوماتي ټکنالوژۍ د سیستمونو پرانستل مهم ګام یاد کړ او د پلټنې عالي ادارې د ټولو برخو په برښنایي او ډیجیټل کولو یې ټینګار وکړ. په دې مراسمو کې همداراز د مالي او اداري چارو مرستیال ښاغلي نجیب الرحمان رحماني په اوسني وخت کې د برښنایي معلوماتي سیستمونو ارزښت او رول ته په اشارې، د ادارې په دننه کې په ډېر لږ لګښت سره د ۱۳ معلوماتي سیستمونو رامنځته کول لویه لاسته راوړنه یاده کړه. هغه زیاته کړه چې له دې سیستمونو څخه په اغیزناکې ګټې اخیستنې سره به د پلټنې عالي ادارې کاري بهیرونه چټک او لازمې آسانتیاوې به رامنځته شي.
په پای کې د معلوماتي ټکنالوژۍ رییس ښاغلي شېرزاد زاهد د یادو سیستمونو په اړه د هر اړخیزو معلوماتو د وړاندې کولو ترڅنګ د پلټنې عالي ادارې له کارکوونکو وغوښتل چې یاد سیستمونه وکاروي. نوموړي همداراز زیاته کړه چې په راتلونکي کې به د ادارې نورو برخو ته هم ورته سیستمونه طرحه او چمتو کړي.
