د پلټنې عالي ادارې پلاوي؛ لوړو زده کړو وزارت کې د پلټنې پرانیست غونډه جوړه کړه
د پلټنې عالي ادارې پلاوي، چې پکې د دعوت او ارشاد رییس ښاغلي مولوي محمد عیسی راهب، د پوهنې، روغتیا او کلتور د پلټنې برخې رییس ښاغلي عبدالاحد قیومي، د کورنۍ پلټنې، له کیفیته د ډاډ رییس ښاغلي مولوي عبدالهادي امین، د معلوماتي ټکنالوژۍ د پلټنې برخې رییس ښاغلي نویدالله امان او د پلټنې ډلې غړو ګډون درلود د ۱۴۴۵ هـ ق کال د رجب المرجب په ۱۱ نېټه، د لوړو زده کړو وزارت له علمي مرستیال ښاغلي مولوي لطف الله خیرخواه او نورو مسوولینو سره ولیدل.
ناسته کې د پلټنې عالي ادارې پلاوي، د ادارو په کړنو کې د سمښت او له بیت المال څخه د سمې ساتنې په پار د پلټنې په موخو، صلاحیتونو او ارزښت هر اړخیز معلومات وړاندې کړل، او د لوړو زده کړو وزارت له مسوولینو یې د پلټنې په بهیر کې د همکارۍ غوښتنه وکړه.
وروسته د لوړو زده کړو وزارت علمي مرستیال د پلټنې عالي ادارې د پلاوي له ورتګه خوښي څرګنده کړه او پلټنه یې په ادارو کې د سمونو د راوړلو په پار اړینه وبلله او له پلټونکو سره یې د هر اړخیزې همکارۍ ډاډ څرګند کړ.
