د عامه پروژو ریاست د پلټنې ټیم د مسلکي او تخنیکي زده کړو په اداره کې پای غونډه جوړه کړه
نن چهار شنبه د ۱۴۰۱ هـ ش کال د لړم په ۴ چې د ۱۴۴۴ هـ ق کال د ربیع الاول له ۲۹ سره برابره ده، د پلټنې عالي ادارې پلاوي د مسلکي او تخنیکي زده کړو په اداره کې پای غونډه جوړه کړه، په غونډه کې د دعوت او ارشاد رییس ښاغلي مولوي عیسی خان راهب، د عامه پروژو رییس ښاغلي انجینر سیدمنان سهار، د عامه پروژو د پلټنې امر ښاغلي انجینرمحمدطاهر فیض، د ټاکل شوي پلاوي امر ښاغلي مولوي عبدالله عارف زي، د پلټنې پلاوي غړو او د تخنیکي او مسلکي زده کړو مالي او اداري مرستیال ښاغلي مفتي فضل الرحمن فضل، مالي او حسابي رییس ښاغلي حامد پوپل او نورو مسولینو پکې ګډون کړی و جوړه شوه.
غونډه د مبارک قران په سپېڅلو ایاتونو پیل شوه، ورپسې ښاغلي انجینر سیدمنان سهار د مسلکي زده کړو له ادارې د پلټنې په پروسه کې د پلټنې له ټاکل شوي ټیم سره له کړې همکارۍ مننه وکړه.
د غونډې په دوام د مسلکي او تخنیکي زده ادارې مرستیال مفتي فضل الرحمن د پلټنې ټیم د موندو د پلټنې د راپور مسودې او ځینو ساختماني پروژو په اړه خبرې وکړې.
ښاغلي مولوي عیسی راهب بیا د پلټنې په ارزښت او د عامه شتمنیو د ساتلو په بهیر کې یې د پلټنې عالي ادارې په رول خبرې وکړې، نوموړي زیاته کړه : د پلټنې عالي ادارې دنده چې ادارو ته پوهاوي ورکړي څو خپلو مسولیتونو ته پام وکړي او په سم ډول یې ادا کړي.
د غونډې په دوام د پلټنې د راپور له مسودې یوه کاپي یادې ادارې ته ورکړل شوه، د غونډې په پای کې د تخنیکي او مسلکي زده کړو ادارې په دې بنسټ کې د پلټنې له جریانه خوښي وښوده او یاده پروسه یې د روڼتیا په رامنځته کولو کې مهمه وبلله.
