د ښاریانو د ګډون چارو ته د رسیدنې کمېټې غونډه تر سره شوه
د ښاریانو د ګډون چاروته د رسیدنې کمیټې لسمه غونډه د پنج شنبې په ورځ د۱۴۰۰ لمریز کال د وري په ۱۲ نیټه، د کړنو او معلوماتي ټکنالوجۍ د پلټنې په چارو کې مرستیال او د ښاریانو د ګډون چارو ته د رسیدنې کمیټې رئیس ښاغلی سید بلال هاشمي، په مشرۍ او د دې کميټې د غړو په ګډون د پلټنې عالي ادارې د غونډو په تالار کې ترسره شوه.
دښاریانو چارو ته د رسیدنې کمیټې رئیس د غونډې ګډونوالو ته هرکلی ووایه او د خلکو شکایتونو ته د رسیدلو، دهغوی وړاندیزونو، د خلکودپوهاوي،دګډو (مشارکتي) پلټنو د ارزښت، اهمیت او همدارنګه دعامه ادارو په پیاوړي کیدو کې دپلټنې د ونډې په اړه یې بشپړې څرګندونې وکړې.
ورپسې د ښاریانو د ګډون چارو ته د رسیدنې کمیټې د تیرو غونډو د پریکړو د پلې کیدو په اړه راپور وړاندې شو، د کمېټې غړو د پلټنې د راپورونو، د ښاریانو د موندل شویو شکایتونو د ورستي کیدو اوخپرولو د څرنګوالي په اړه یې خبرې وکړې او د غونډې ګډونوالو په خپل نوبت سره خپل وړاندیزونه او نظرونه د یادې موضوع په اړه وړاندې کړل او پدې اړه لازم هوډونه ونیول شول، په پاي کې اړونده برخو ته لارښوونه وشوه، تر څو د کمیټې د پرېکړې له مخې په ټاکلي وخت کې کړنې تر سره کړي.
دیادونې وړ ده چې دملي شورا استازی، دمدني ټولنو او رسنیو استازي، د مرستندویه بنسټ استازی او د پلټنې عالي ادارې اړونده کارکوونکي دکمیټې غړي تشکیلوي.
